جیزما قارا

شعرلریمه اؤلو گیریب

رامین جهانگیرزاده

های سالمایین

آدامین رنگی سارالار

میلچکلر قونار دوداقلارینا

یویارلار جسدینی

آغ کؤینک گئیدیریب

قویارلار تابوتا

گزدیررلر چیینلرده

آپارارلار قارانلیق اوتاغا

اوتاقدا قالیب چورویر

اتی سومویوندن آییریلار

سومویو قالخار

گزر هر یئری

های سالمایین

آدامین گولمه­یی گلیر

شعرلریمه اؤلو گیریب

دیشلرینی بیر ـ بیرینه ووروب

قورخو سالیب سطیرلریمه

سطیرلریم بوزوشور

کلمه­لریمین جانینا قورخو دوشور

بو اؤلو چوخ اینادکاردی

هئچ نه وئجینه دئییل

هئچ نه­یی ائشیتمیر

قولاغی کاردی

چیغیریرام

باغیریرام

دیشلریمی قیجیدیرام

حیرصله­نیرم

بو اؤلونون گؤتونه تپیک وورسام دا

پئسرینه قاپاز چالسام دا

قولاقلاییب شعلریمدن چیخارتماغا چالیشسام دا

یئنه ده دیشلرینی بیر ـ بیرینه ووروب گولور

اونون قورخولو گولوشندن

کلمه­لریم قورخوسوندان اؤلور

شعرلریمدن چیخان دئییل

بو سیرتیق اؤلو

کلمه­لریمی سویقیریم ائتمه­یینجه

دینجلمه­یه­جک

های سالمایین

باشینیزا دؤیمه­یین

اؤلولری قبیردن خورتلادیب

شعریمین جانینا سالمایین

قویون اؤز باشینا قالسین تابوتلاردا اؤلولر

باتیرسالاردا باتیرسینلار تابوتو

تکی شعلریمه یاخین گلمه­سینلر

کلمه­لریمه کلمه دئییب آغلایان دئییلم

رامین جهانگیرزاده­نین اوشاقلار اوچون یئنی بیر شعر توپلوسو  ایشیق اوزو گؤردو

آیسودا

(اوشاق شعری)

یازان: رامین جهانگیرزاده

رسام: رامین میرزایی

ناشر: ندای شمس

دیزاین: حسین یوسفی سادات

اندازه: خشتی

صفحه: 16

تیراژ: 5000 جلد

بیرینجی چاپ: 1389

قیمت: 800 تومن

شابک: 6-32-2688-964-978

---------------------------

ساتیش مرکزی: تبریز ـ «ندای شمس» نشریاتی

 5540252-0411  & 09147634670

آغزینی آچیب تعججوبله باخما قیزیم

رامین جهانگیرزاده

آغزینی آچیب تعججوبله نه باخیرسان منه قیزیم!

بلکه اولمایا سن ده ائله دوشونورسن کی

من باشقا کوره­دن گلمیشم؟!!

دوزدور!

من باشقا کوره­ده یاشاییردیم بیر زامانلار

بیر ده­نه یئدییم یاساق مئیوه­دن اؤترو

ـ سنین یئرین بورا دئییل ـ دئییب تدیلالر

 پئیسریمه بیر قاپاز ووروب آتدیلار بو کوره­یه

قارا داشین اوستونه دوشدوم

آغرینین نه اولدوغونو آنلادیم

گزدیم

دولاندیم

سومسوندوم بو کوره­نین

داشینی

قومونو

مئشه­سینی

بیردن بیره اونو گؤردوم

اوره­ییم سیخیلدی

سئودیم اونو

آنجاق ندنسه چکینیردیم اوندان

قاچیردیم قارا مئشه­لیکلرین

قارا کوللاریندا گیزله­نیردیم

او منی تاپا بیلمه­سه­یدی ده

من اونو همشه ایزله­ییردیم

او قوش اوزومو دریب یئیینده

دوداقلارینا یاییلیردی

اؤز اؤزومه گولومسه­ییردیم

او بیردن دیسکینیب

هیجانلی باخیشلاریلا آختاریردی منی

هئچ نه دئیه بیلمیردیم

قورخومدان گیزله­نیردیم

اونون نه اولدوغونو آنلامیردیم

بیر گون گؤزله­نیلمه­دن چیخدی قاباغیما

گؤزلریمه ایضطیراب دولدو

قاچدیم

قورخو ایله هیجانین ایچینده اولارکن

بیر آن دایاندیم

او باخدی منه

من باخدیم اونا

چکینه چکینه یاخینلاشدیم

او اووجونو آچارکن دردیکلری قوش اوزومونو

 منه ساری توتدو

اللریمی اوزاتدیم

قوش اوزومونو آلدیم

هیجانلا یئدیم

بیر سؤز دئمه­دیم

او گولومسه­دی

من گولومسه­دیم

ایلک سئوگیمیز گولوشله باشلاندی

بیز گولندن سونرا هر نه ده­ییشدی

اوشاقلاریمیز اولدو

اوشاقلاریمیز آغلاماغی اؤیرشدی

اوشاقلاریمیز آغلاماغی اؤیرتدی

سونرا هر نه اولدو

هر نه دولدوردوق بو کوره­یه

باهاریمیز خزان اولدو

قیش یئتیشدی

گؤیدن یئره قار گلدی

بو یئر بیزه دار گلدی

آغزینی آچیب تعججوبله باخما قیزیم!

هله بو کوره­ده چوخ شئی­لر باش وئره­جک… 

ایشه باخ قار آدامی اولدوم

رامین جهانگیرزاده

بورنومو اوزاتدیم خیابانلارین ایچینه

اودخوندوم بوغازیمدا شهرین هئیکلینی

رحمتلیکلرین شکلی دیواردا

آدام اؤلندن سونرا دیوارا یاپیلیر

سوسوب ائله یاپیلدیغی کیمی قالیر

بیزه هده قورخو گلیب

اؤلومون نه اولدوغونو رحمتلیکلر آنلاتسالار دا

بئله قالمیر شکیللری

یاغیش یاغیر

سوزولور دیوارلارین جانینا

هوپور رحمتلیکلرین شکیللرینه

گون چیخیر

سارالیر شکیللری

یاددان چیخیر هر نه

یاددان چیخیر رحمتلیکلر

شکیللری قالمیر

سویورلار زیبیلچی­لر سارالمیش شکیللرینی

آدامی اؤلندن سونرا دیواردان سویوب

زیبیل قابینا آتیرلار

من بئله قالا بیلمیرم

اسنه­ییرم آیاقدان باشا

اسنه­ییرم شهرین دیوارلارینی

نارین نارین قار ده­نه­سی

یئرین اوزو آغ اولور

آیاغیمدان قوپور قارا ایز

اوزومه قار قونور

ایشه باخ قار آدامی اولورام

ایچیمدن قارا چیخیر

نارین نارین قارالیرام

دئییرلر قار آدامی اولا بیلمزسن

ائندیرمه­سن اؤزونو

یاپیشیرام اؤزومدن، ییرتیرام یاخامی

ـ ایتیل مندن، ایتیل!ـ دئییرم اؤزومه  

نارین نارین قار ده­نه­سی

لیغیم چیخیر جانیمدان

لیغیم قالیر قار آلتیندا

ایشه باخ قار آدامی اولدوم

ربیقه ناظيم­قيزي­نين، ووصال نورونون، رامين جهانگيرزاده­نين شعرلري ده ايستيثنا تشکيل ائدن شعرلر سيراسيندادير، اؤزونه­مخصوص پوئتيک چالارلاري ايله يولون اوغورلو باشلانغيجيندان خبر وئرير. داها چوخ ليريزم و ائموسيونالليق، حيسين، دويغونون پسيخولوغي لاددا گرگين­ليیي، ليريک خاراکتئرين فاجيعه ­ايله سونوجلانان حيات طرزي کيمي علامتلر بو گنجلرين شعرلرينده اساس اوسلوبي کئيفيت­لر کيمي اؤزونو گؤسترير. 

  بولواردا پورترئته دؤنور بو گون: 

  ساحيلده آداملار اوزور، 

  گزير دنيزده باليقلار. 

  ساحيلده اوچور اؤزونو قاغايي­لارا  

  بنزه­دن يارپاقلار 

  قاغايي­لار دنيزه تؤکولور. 

  آغاجلار ساحيلده لؤوبر ساليب. 

  بيتيب دنيزده گمي­لر 

  دنيزده گونش وار بو گون. 

  ساحيلده گونشي باتميش بير آدام.  

ووصال نورونون بو شعري­نين اساسيندا ياخشي معنالانديريلميش رئال حيات فاکتي دورور: دنيزده گونشي باتميش اينسان و هارمونيياسي پوزولموش، نيظامي ايتميش طبيعت اوبرازي. آنتي­تئزامي، قانونا اويغونلوقمو؟ گؤروندويو کيمي، مؤليف اساس ماهيته چاتانا قدر فيکري موختليف اينستانسييالاردان کئچيرير، ماراقلي مئتافورا پوليفونيياسي يارادير، فرقلي، تضادلي گؤرونتولره اوريژينال، مجازي يوک ، معنا سيقلتي، سيمووليک چالار وئره بيلير.ان اساسي ايسه بو آبسورد تصويرلر گؤيدن دوشمه، فورس ـ ماژور تاثير باغيشلامير، متنين اؤز ايچيندن دوغولور، طبيعي­ليیي ايله اينانديرير. 

  بئله بير طبيعيليک و صميميت رامين جهانگيرزاده­نين شعرلرينه ده خاصدير. بو شاعيرين «آلاتوران»  ژورنالي­نين 13 ـ جو ساييندا چاپ اولونموش آشاغيداکي شعري منه سون ايللرين ماراقلي نومونه­سي تاثيريني باغيشلادي.

  شيريلدايير آدين اسن يئللرله 

  لال باخيشيندان قاسيرغالار قوپور 

  آليشير سولارين دالغاسي 

  ليلله­نيرسن 

  اللريندن سطيرلر آخير. 

  جسارتيني قوروسان  

  ازيلمه­يه­جک بياض­ليغين 

  واراقلانديقجا گؤزللشه­جکسن 

  آلاجاغيني اولاجاغيندان آلاجاقسان 

  نورلان ميصراعلاريندا 

  شيريلدات کلمه­لريني 

  ايضطيرابلي کاغيذلارا 

  رومانتيک اولاجاقسان، اينان!

  ايلک باخيشدا تصوير و ترننوم تصووراتي يارادان بو شعرين ماهيتينده حياتا و دونيايا باخيشيميزا يئني رنگلر، چالارلار علاوه ائدن، اونلاري يئني بيچيم و آهنگده سرگيله­ين موتيولر وار. مؤليف پوئتيک سجيييه­لي اوبرازلارين پافوس، آهنگ و شعريت آخارينا معنالي بير باخيش، رومانتيک بير روح علاوه­ ائدير، يئني فورمادا يئني مضمون قاتي ياراتماغا مووفق اولور. غئيري ـ عادي قافييه، بنزتمه و ايفاده سيستئمي شاعيرين لاکونيک اوسلوبونون گؤستريجي­سي کيمي چيخيش ائدير. شعرده کي  وزن، موسيقي­ليک سؤزون سيرايت گوجونو بيرباشا حيسلريميزه يئريدير، اونداکي مؤوجود آسسوسياسييا تفککور طرزيميزي حرکته گتيرير، داها سونرا بئينيميزه، دوشونجه ميزه معنا، مضمون آشيلانير، او قدر کي، شعرين سون ـ «رومانتيک اولاجاقسان، اينان» ميصراعسي­نين اساسيندا دوران پوئتيک منطيقي گؤره بيليريک. 

  * * * 

  چاغداش پوئزييا نومونه­لري حاقيندا قناعتلريميز بو قدر. البتته پوئزيياميزين عومومي منظره­سيني سجيييه­لنديرن ايمضالار و گرگين اوسلوبي آختاريشلار، هله يالنيز بديعي ـ ائستئتيک تجروبه خاراکتئري داشييان شعر نومونه­لري داها چالارلي و رنگارنگدير. بحث ائتديیيميز و ائتمه­ديیيميز بو نومونه­لرين ادبي فاکتا، ياخود عکسينه، عؤمرو گؤدک قومبولاغا چئوريله­جه­یيني ايسه زامان گؤستره­جک. او زامان کي، سؤيله­نن بوتون فيکير و مولاحيظه­لره رغمن سون نؤقطه­ني هميشه اؤزو قويور. 

قایناق:

http://www.hafta-ichi.com/v4//2010/12/31/read=58369#

http://www.hafta-ichi.com/v4//2010/12/31/read=58179

ائتود

رامین جهانگیرزاده

اللریمده قارا کؤمور

سیز کؤزرمه­یه باشلاییرسیز

سیزی چکمک بیر آز چتین

بالیقلار لیلنمیش بئینیزدن آتیلیر

توتماق ایسته­ییرسیز

بالیقلار اللرینیزدن زویویور

قاییرما دیشلرینیزین دیبیندن

سؤزلر سیزیلداییر

دیرناقلارینیزین آراسینا گیریر سؤزلر

دیرناق آراسی دانیشیرسیز

دیرناقلارینیزی باتیریرسینیز اتینیزه

اتینیزده سوموک اویناییر

سومویونوزه دوشور قیش هاواسی

بوز چیچه­یی گؤزلرینیزدن بیترکن

گونشی گؤروب اؤلور

ویجدان

رامین جهانگیرزاده

اونو چکدیلر محکمه­یه

ویجدانینی سوروشدولار

باشینی قاشییارکن دئدی:

ـ ویجدانیمی قارا ایت یئدی.

قارا ایتی توتدولار

قوس دئدیلر ویجدانینی!

قوسدو

قوسدو تک قیچلی ویجدانینی

ایت اولوب هوردو محکمه­ده ویجدان

دارتیندی اونون اوستونه

دارتیندی پارچالاییب

اونو ییرتماق قصدینه

ویجدانی توتدولار

ویجدانی قارا حیصارا چکیب

دوستاغا آتدیلار

او محکمه­دن جانین قورتاردی

گولدو

گولوشلری دوداغیندا قورودو

گولوشلری دوداغیندان دوشدو

شالواریندان سوروشدو

گولوشلری اوشودو

گولوشلری زیبیللرین ایچینده گیزلندی

دیلینی دینج قویمادی

اؤزونه قییمادی

اؤزونه گوپلادی اؤزونو

گوپلادی سؤزونو

سؤز دیرماشدی بوغازیندان

سؤز آتیلدی آغزیندان

آتیلدی آتیلمایان یئره

داراشدی اوستونه قاریشقا

داراشدی اوستونه بیره

ییرتدیلار

سؤزو یئدیلر

هئچ نه دئمه­دیلر

او باخدی

باخیشی آخدی گؤزوندن

باخیشی یاخیلدی یاناغینا

یاناغیندان سوزولدو دوداغینا

دوداغیندان گیردی ایچینه

باخدی اونا

باخدی گوپچولار یوردونا

باخدی آغ ـ قارا یالانلارا

قاراسی آغینا قاریشمیشدی

آغی قاراسینا

ایچینده قالمیشدی ویجدانینین تک قیچی

باتمیشدی آغ ـ قارا یالانلارین ایچینده

یاتمیشدی گوپچولار یوردووندا

آیاغا دورا بیلمیردی ویجدانینین تک قیچی

کاریکلماتور

رامین جهانگیرزاده

1

اللرینده گولدان

قارا آفریقالی قیز

اوزونو گؤیه توتموشدو

سحیرلی بیر بوغدا

گؤیدن یئره ائنه­جک

2

گونشی شورابا قویدولار

گئجه کیفسیدی

3

باشی بدنینه آغیرلیق ائتدی

باشی بدنینه باتدی

4

الیمین ایچی کیمی بیلیردیم کی

الیندن هئچ بیر شئی گلمز

5

بیر گیله سیقارئت بارماقلاریمین آراسیندا

 هر واخت منی اینجیدیرسن

صاباحا قدر چکیرم سنی

پازئل

رامین جهانگیرزاده

سن بير پازئل

نه قدر ده دارماداغين

دوداقلارين ائوين بير کونجونده

ياناقلارين ميوه­قابينداکي آلمالارين يانيندا

ساچلارين داراقدا

گؤزلرين گولداندا

اللرين مطبخده

قاشلارين گوزگوده

قولاقلارين قاپي­نين باشيندا

بير آياغين قاپي­دا

بير آياغين چؤلده

دوداقلاريني ياناغينا قويورام

گؤزلري­نين بيريني قولاقلاري­نين بيرينه

او بيريسيني ده، بورنونون يانينا قويورام

اللريني…

قاشلريني…

قيچلاريني…

هر نه­ييني بير ـ بيرينه ووردوم

من سني دوزه بيلمه­ديم

سن اؤزون گل

اؤزونو دوز

Pazel

Ramin Chanagirzadə

Sən bir pazel

Nə qədər də darmadağın

Dodaqların evin bir küncündə

Yanaqların mivəqabındakı almaların yanında

Saçların daraqda

Gözlərin güldanda

əllərin mətbəxdə

qaşların güzgüdə

qulaqların qapının başında

bir ayağın qapıda

bir ayağın çöldə

dodaqlarını yanağına qoyuram

gözlərinin birini qulaqlarının birinə

o birisini də, burnunun yanına qoyuram

əllərini…

qaşlərını

qıçlarını…

Hər nəyini bir – birinə vurdum

Mən səni düzə bilmədim

Sən özün gəl

Özünü düz

یئر آدامی

رامین جهانگیرزاده

من بو یئری دولانمیشام

تورپاق بویو تالانمیشام

اؤز ایچیمده قالانمیشام

قالانیمی ییغان یوخدو

منی بیر ده دوغان یوخدو

قاناد وئرین اوچوم گئدیم

قانادیمی آچیم گئدیم

بو یئرلردن قاچیم گئدیم

یئر آدامی اولانمیرام

یئرده داها قالانمیرام

کور اولمادیم کار ساریدی

کار اولمادیم کور ساریدی

آراز دئدیم کور ساریدی

بو نه ایشدی دئدیم آللاه

آللاه چکیر اورکدن آه

قارغا قوندو گؤزلریمه

ایلان دوشدو ایزلریمه

زهر یایدی دیزلریمه

مله­مه­دیم قویون کوسدو

اوینامادیم اویون کوسدو

گونش دئدیم گئجه گولدو

خوروزلاندی بئچه گولدو

هر نه واردی هئچه گولدو

بیزی هئچلر هئچه ییخدی

هر نه­ییمیز هئچه چیخدی

هئچ نه منه آلا دئدی

بارماغیلا گالا دئدی

بسدی قورتار بالا دئدی

سن هئچلرین بالاسی­سان

بو یئرلرده قالاسی­سان

گؤی آدامی اولمادیم من

بولود اولوب دولمادیم من

اؤز ایچیمی یولمادیم من

یئردن چیخیب یئره گئتدیم

تورپاق اولوب یئنه ایتدیم

قارا زیغدان یارانمیشام

یئر اوزونده دارانمیشام

تورپاقلاردا اوررانمیشام

جانیم چیخار سؤزوم قالار

گودور منی قاریشقالار