Balıq qulağı
Sahili oğurlayıblar,
Dəniz quldurları.
Ulduzları boğublar,
Qara buludlar.
Hər yerə baxırsan özünü görürsən.
Öz-özünə gülürsən,
İçindən qopur qasırğalar.
Qaranlığın sırtıq ilğımında,
Öz başına fırlanıb, azırsan özündə.
Yelkənlərin yırtılır,
Batır sınıq gəmin,
Vəhşi dalğaların qıynağında…!
Qıyırsan gözünü…
Üzülürsən gəmidən… Batırsan,
Balıq olmağa çalışırsan…
Üzürsən…
Suların nəbzi döyünür.
Balıqların qulağına oxuyursan səsini…!
İndi otaqdayam
Uzanmışam…
Gözümü yumub,
Dənizə qarışmış səsinə qulaq asıram…!
- sabah yenə sahilə gedəcəm,
Doyuncaq Balıq qulağı yığıb …
Güldanımın dibini dolduracam…!
بالیق قولاغی
ساحیلی اوغورلاییبلار،
دنیز قولدورلاری.
اولدوزلاری بوغوبلار،
قارا بولودلار.
هر یئره باخیرسان اؤزونو گؤرورسن.
اؤز-اؤزونه گولورسن،
ایچیندن قوپور قاسیرغالار.
قارانلیغین سیرتیق ایلغیمیندا،
اؤز باشینا فیرلانیب، آزیرسان اؤزونده.
یئلکنلرین ییرتیلیر،
باتیر سینیق گمین،
وحشی دالغالارین قییناغیندا…!
قیییرسان گؤزونو…
اوزولورسن گمیدن… باتیرسان،
بالیق اولماغا چالیشیرسان…
اوزورسن…
سولارین نبضی دؤیونور.
بالیقلارین قولاغینا اوخویورسان سسینی…!
ایندی اوتاقدایام
اوزانمیشام…
گؤزومو یوموب،
دنیزه قاریشمیش سسینه قولاق آسیرام…!
- صاباح یئنه ساحیله گئده جم،
دویونجاق بالیق قولاغی ییغیب …
گولدانیمین دیبینی دولدوراجام…!
