جیزما قارا

بیر آچیقلاما

دیققت                                     دیققت

یئنه ده کیمسه منیم آدیما دخیل دوشوب حاجتینی آلماق ایسته­ییر!!! اومید ائدیرم کی آدیم اونون دویونون آچاجاق و یازیق بو مریض آدام شفا تاپاجاق آدیمدان.

سایین دوستلار! منیم آدیملا سیزین وئبلاگلارینیزا کامئنت قویوب یامان یوز یازان مریض بو آدامی منیمله سحو سالماماغینیزی بیلیرم کی بیلیرسیز.

هر حالدا منیم آدیملا هر کیمسه­نین وئبلاگینین کامئنتلرینده یامان یوز و یاخود هرزه سؤزلر یازیلیب اؤز بؤیوکلویونوزه گؤره باغیشلایین منیم بو پیر آغاجینین کؤکونه دوشموش آدیمی!!!

آللاه بوتون مریضلره شفا وئرسین!!!!!!!!!!!!!!----آردی---->

                                   حؤرمتله: رامین جهانگیرزاده(آیاق یالین + سؤز آتان)

دال با دال سيقنالا باسيرام اؤزومو

سني گيجه­ليرم

گئجه­يه دوشوب

يولومو آزيرام

چاش باش ووروب

چالا چوخورا دوشن ماشين کيمي

آتيليب دوشورم

قيزديريرام

خفله­نيرم

توستوله­ييرم

سني اؤزومده ايتيريرم

سني چاشيرام

اليمي سيقنالين اوستونه قويوب

دال با دال سيقنالا باسيرام اؤزومو

چکيلميرم اؤزومدن

باسلاييرام اؤزومو

بيردن بيره دايانيرام

باخيرام اؤزومه

هر يانيم ازيليب

هر يانيم سينيب

قورخورام

قارا باسير مني

قارا قورخو ايچينده

اؤز-اؤزومه

- بيردن پوليس موليس اولار

مني ياخالايار- دئيه

يئنيدن استارت وورورام

يولا دوشمک زوروندا اولورام

آليشميرام

يولا دوشمورم

اؤزومدن دوشوب

اؤزومه حول وئريرم

تاراق توروققا دوشوب

يئنه ده آليشيرام

ديبقاز گئديرم

بوكساواد ائله­ييب

يئنه ده يولا دوشورم

چالا چوخورلارا باخماياراق

قاچيرديرام اؤزومو

سن راحات اول

راحات اَيلش ايچيمده

هارا دئسن يئتيرجم

تکجه هئچ کيمه دئمه کي

من اؤزومو باسلاديم

هو الجمیل

مین بیر اؤیکو فئستیوالی

اینترنت اوزره کئچیریله­جک "مین بیر اؤیکو" آدلی ادبی یاریشدا، هر بیر سیاسی باخیشدان اوزاق گزه­رک، یالنیز و یالنیز ادبیاتا دوشونمک مقصدینده­ییک. بو یولو، بوش ال ایله باشلاساق دا، سیزین دولغون یازی­لارینیزا گووَ­نمیشیک. 

"مین بیر اؤیکو" فئستیوالیندا، اؤیکولرین سئچیمینده هانسی سؤزون دئمه­سی نظرده آلینماییب، سؤزون نئجه دئمه­یی اوستون توتولاجاق­دیر. دیل عمومییتده و اؤیکو دیلی (زبان داستانی) اؤزللیکده، هر هانسی یازیچی­نین اثرینی اوخوماقدا اساس فاکت­لاردان بیری ساییلاجاق­دیر. دیل عمومییتده یعنی: اؤیکونون آذربایجان تورکجه­سینده یازیلماسی. دیلیمیزین قورولوشونا اویغون اولان یارادیلیجیق­لار، ان چوخ نؤمره­لری قازاناجاق­لار. بوردا، "یارادیلیجیق" سؤزونو دئدیییمیزده، چاغداش بیر اؤیکونون قایدالاری اساسیندا یازیلمیش اثرلردن دانیشماقداییق. الیمیزه چاتاجاق اثرلر ایچره­سینده، یالنیز، قرامئر باخیمیندان دوزگون­جه­ یازیلمیش یازی­لارا ده­یر وئریلمه­یه­جک­دیر؛ اونلارین چاغداش بیر اؤیکونون اؤزللیک­لرینی داشیدیق­لاری دا، کسکین­له نظرده آلیناجاق­دیر. 

اؤیکو دیلی دئدیییمیزده ایسه اؤیکونون قوللوغوندا اولان دیل مقصددیر. بوردا ادبی دیل دئییل، سؤیلم (روایت)ـین گره­ک­لرینی نظرده آلاراق، حتتا یوزه یوز ادبی دیل ایله ده اوست اوسته دوشمه­ین یازیچی­نین قونداردیغی دیلدن دانیشیریق. اؤیکو دیلی، سؤیلمین دوغما آلینماسیندا بیرینجی رولدا اویناییر.

ژوری هئیت: محمود مهدوی، آتیلا اسکندانی، رضا کاظمی

***

ـ "مین بیر اؤیکو" ادبی یاریشی، یالنیز، اؤیکو ساحه­سینده کئچیریله­جک­دیر.

ـ یازیچی هر بیر یاشدا اولورسا اولسون، بو ادبی یاریشا قاتیلماق اوچون سن محدودیتی قویولماییب­دیر.

ـ هر یازیچی ان چوخو ایکی اؤیکو گؤندَره بیلر.

ـ گؤنده­ریله­جک اؤیکولرین بیر یئرده چاپ اولوب اولماماسی اؤنملی دئییل.

ـ یازی­لارین Word  فایلیندا، Tahoma فونتوندا گؤنده­ریلمه­سی اؤنه­ریلیر.

ـ یازیچی­یا عایید اؤزل بیلگی­لر، او جومله­دن آد، سوی آدی، دوغوم ایلی، ایلگی قورماق اوچون تلفون (یوخسا موبایل) نؤمره­سی گره­کلی­دیر. یازیچی­نین قیسا ادبی بیوقرافی­سی بونلارا آرتیلیرسا، داها آرتیق یئرینه دوشر.

ـ اؤیکولر، آذر آیی­نین 10 ـجو گونونه قدَر MinBirOyku@gmail.com آدرسینه گؤندَریلمه­لی­دیر. (بو مؤهلت، هئچ بیر شراییطده تمدید اولونمایاجاق­دیر.)

ـ سونوج­لار (نتیجه­لر)، بو ایلین قوربان بایرامیندا، آذر آیی­نین 19 ـجو گونونده Www.Oykuler.blogfa.com بللی اولوناجاق­دیر.

ـ فئستیوالا گؤندَریله­جک اؤیکولرین ایچیندن، ژوری هئیتین نظری ایله اوچ اوستون اؤیکو سئچیله­جک­دیر.

ـ بیرینجی یئری قازانمیش اؤیکونون یازارینا 120000 تومن، ایکینجی­سینه 100000 تومن، اوچونجوسونه ایسه 80000 تومن اؤدول وئریله­جک­دیر. بونلاردان علاوه، سئچیلمیش یازیچی­لارا بورونج تقدیر لؤوحو، بیر ده بیر پارا هنری اثرلر هدیه اولوناجاق­دیر. ­