جیزما قارا

İyirmi dönəlik

İyirmi dönəlik

İyirmi dönə

ovcumun içində alışıb, yandım

İyirmi dönə

Barmaqlarımın arasında kül oldum

İyirmi dönə

Ayaqladım özümü

İyirmi dönə

Soyudum, söndüm

İyirmi dönəlik

Gicəldim, dolandım özümü

Addımlarımda Küçüklədi küçələr

Çəkdi dırnaqlarımı sızaq

İyirmi dönəlik

Qopdum sümüklərimdən

Sümüklərimə hopdu soyuq

İyirmi dönəlik

Şəhəri içimdə dondum, soyuqladım

İyirmi dönəlik

Qara adamına dönüb, Donsam da

Soyumadım…!

ایییرمی دؤنهلیک

ایییرمی دؤنه

اووجومون ايچينده آليشيب يانديم

ایییرمی دؤنه

بارماقلاريمين آراسيندا کول اولدوم

ایییرمی دؤنه

آياقلاديم اؤزومو

ایییرمی دؤنه

سويودوم، سؤندوم

ایییرمی دؤنهلیک

گيجلديم، دولانديم اؤزومو

آددیملاریمدا کوچوکلهدی کوچهلر

چکدي ديرناقلاريمي سيزاق

ایییرمی دؤنهلیک

قوپدوم سوموکلريمدن

سوموکلريمه هوپدو سويوق

ایییرمی دؤنهلیک

شهري ايچيمده دوندوم، سويوقلاديم

ایییرمی دؤنهلیک

قار آدامینا دؤنوب، دونسام دا

سويوماديم…!

+ نوشته شده در یکشنبه بیست و نهم دی 1387ساعت 20:46 توسط رامین جهانگیرزاده |

ŞAİR OLDUN

شاعير اولدون…

1

شاعير اولدون، شعر يازدين. ميصراعلارينلا هر نهيي قويدون يئرينه. يئريکلهدي قارني يئکه کلمهلرين.

-نئچه آيليقدير؟!!- دئديلر.

- دوققوز آيليقدير- دئدين.

دوققوز آيي قورتارسا دا، دوغمادي کلمهلرين. قارنيندا اؤلدو اوشاغي.

2

شاعير اولدون، حؤرمت قازاندين. قازانديغيني قازان ديبي گؤررکن، بير يوللوق ايتيردين. سؤز سالدين آرايا، آرالاندي آراسي. سؤزونون اوستونه اودون ييغديلار، اودلاندي سؤزجوکلرين. کوله دؤندردين هر نهيي. دئييندين…! دئييندين…! يئنه ده دئييندين…! آديني رشيد قويدون، اوز گؤزونو توتوب، يوزونو دئدين، بيريني ائشيتمهدين.قولونداکي ساعاتي، قاباغا چکسن ده، دينگيلوايي، دينگيلوايي دئييب، دالدا قالدين. قاباقدا گئدنلره داش آتدين، توپوغا ديدي.

3

شاعير اولدون، شعر يازدين. دايازليقدا ياشاييب، درينليکدن دانيشدين. دنيز درينليیين اولدو. اوزمهیي باجارمادين. بورجوتدون، چوبالادين، ال آياق چالدين. سو بوغازينا چاتجاق، کيم اولور اولسون قويدون آياغينين آلتينا، چولونو سودان چيخارتدين. نفس چکدين آداملاري.

4

شاعير اولدون، شعر يازدين. چؤرهیين داشدان يوخ، شعردن چيخدي. جينگيلتيلري ائشئتجک، جينگيلوايا دوشدون. جانينا هوپدو جينگيلتيلر.

5

شاعير اولدون، شعر يازدين. اؤزونو هچله سالدين، باشيندا بير- نئچه توک وار ايدي، اونو دا تؤکدون. تؤکولدون دوشوک سطيرلره، دمشکلهدين. کئچل اولدون، هاميني کئچل ائلهدين. گوزگويه باخماميش، آديني قويدون اؤزگويه.

6

شاعير اولدون، شعر يازدين. ائرتهدن گليب، اورتادان يئدين. هم سولدان ساغدين

هم ساغدان. نه ساغيني تانيدين، نه سولونو.

بير آز يازيقليق چکدين، بير آز اويودون اويدورمالاريندا. آيا باخيب، گونشدن يازدين.

7

شاعير اولدون، شعر يازدين. شيرين بادام يئييب، آجي باداملاردان يازدين. باداملارين شيرينليیينين دادي چيخمادي آغزيندان. بورنونو هر يئره سوخوب بادام اکدين. بار وئرمهدي باداملارين، قيسير دوشدو. ائله سنه قالان او تامسينديغين شيرين باداملار اولدو.

8

شاعير اولدون، شعر يازدين. بوتون اينسانلارين درديني چکدين. شعرلرينين باغرينا باسدين بوتون آغريلاري. آغيرليغيني، بوغورلوغونو شعرينه تؤکدون. آنجاق قونشونوزدا آجيندان آغنايان، آغريدان ياتمايان داخماداکي او اوشاغي، او قاديني، او کيشيليکدن دوشموش کيشيني اونوتدون، کيتاب کيتاب کيشيليیي باغيران شاعير!!! گؤزله او قدر باغيرارسان، بوغارسيقلارين چؤيرولر، کيشيليکدن دوشرسن.

9

شاعير اولدون، شعر يازدين. قيزيل بايراقلار قوزادين قارا پالچيقلي شعرلريندن. اسديردين قارا يئللرله. هاي برک گلنده، قوزاديغين قيزيل بايراغي سيلگي ائديب، سيلدين چيرکينليکلريني.

10

شاعیر اولدون، شعر یازدین. شعر یازدین…! شعر یازدین…! شعر یازدین…! شعر یازدین…! شعر یازدین…! شعر یازدین…! شعر یازدین…! شعر یازدین…! شعر یازدین…! یالنیز و یالنیز شعر یازدین!!!

>---------> قایناق

+ نوشته شده در جمعه بیستم دی 1387ساعت 12:55 توسط رامین جهانگیرزاده |