جیزما قارا

سؤزوم ياشيل‌ليقدان باشلانير                          

تورپاغين آلتيندايديم. اوستومه قارانليغين آغيرليغي تؤكولموشدو. ائله بيل دونيانين آغيرليغي منيم اوستومده‌ايدي. كيمسه‌ منيم وار اولماغيمدان خبري يوخويدو. من خبرسيزلر يوردوندا تك‌ليييمدن داريخاركن، سوسوزلوغومدان قوروموشدوم. مني دويان‌لار دونيالاريندان دويموشدولار و دونياني دونياچي‌لارا باغيشلاميشدي‌لار. هر نه قورو و من ده قورولار ايچينده قورويوردوم. تورپاق هر گون قورو بير آغيرليغا دؤنوردو. و تورپاقدان يارانميش‌لار، تورپاغا اوز چؤندرميشديلر. اوزون زامان ايدي كي ياتميشديم و ياتميش‌لارين يوردوندا بو قارانليغين آغيرليغيندان كيمسه مني اوياتماق ايسته‌ميردي. اويانانلارين ديلينه يئكه بير قيفيل باغلانميشدي. داريخيرديم. بوتون بو قورو وارليغيمدان قورتارماق اوچون اويانماق ايسته‌ييرديم. من اوياق ايديم هر نه‌يي ائشيديرديم آنجاق آياغا قالخا بيلميرديم. آياغا دورماق گرك و آياقدان دوشنلري آياغا قالديرماق گرك ايدي.

شير!… شير!… شير!… ائله بو سس مني يوخودان اويالتدي دوردوم نئچه ايل‌ليك دورغونلوقدان اويانديم. يولونو گؤزله‌ديييم گلدي. تورپاغين داماريندا سئوينج آخينتي‌سي آخدي و منيم وارليغيمدا سئوينمك چيچك‌لندي. سئوينديم و مني سئونلري سئوينديرديم.

اؤز قينيمدان چيخيب تورپاغين دريسيني قوپارداركن گونشين ايلك پارلاق ساچاق‌لاري منيم گؤوده‌مي دارادي.

آخ!… ايشيق!… ايشيق!… نئچه ايل حسرتينده قالديغيم آرزي. بؤيويوردوم و بؤيوكلرين سئويندي‌ييني گؤروردوم. آرتيق بير ياشيل نغمه‌يه چئوريلميشديم و تورپاغين چاتلاغيندان بوي آتيب بويلانيرديم. گونش بويوما اوخشاييردي و من گونشه ساري بوي آتيرديم. يولوم قارانليقدان چكيلركن ايشيق‌ليقدان كئچيردي. بو يول يولسوزلارين يولو ايدي.

ايندي من آرتيق بوي آتميش بير ياشيل يارپاغام و سؤزوم ياشيل‌ليقدان باشلانير. هئچ بير بالتا قورخوسو ايله ياشاميرام، چونكو كؤكوم اَن درين يئرده‌دير. داللاسالاردا يئنه گؤيره‌جه‌يم و يئنه بير يارپاغا چئوريليب ياشيل‌ليقدان دانيشاجاغام، ياشيل‌ليقدان!

∞∞∞∞

آنامین دیلینی کؤکوندن قوپارتدیم!

دونه­نیمیزی…

بویونوموزو…

صاباحیمیزی…

سیلیب سوپوردونوزهر نه­ییمیزی!

سیندیردینیز سیندیق، سیندیرمادیق

سسیمیزایچیمیزه تؤکولدو

یارالاندیق ایچیمیزده

یارا دوشدو ایچیمیزه

چالخالاندیق…

چیلخامیز چیخدی!

بوکولدوک سسیمیزه!

یالینیز اسکیلمه­سین

چیغیر باغیر سالمایین!

هورمه­یین…!

هورکونمه­یین…!

جینایتلرینیزه دؤزه بیلمه­دیم.

عذابلارینا

آغلاماغینا

آغ ساچلارینی یولماغینا

اوزونو دیدیک ـ دیدیک ائتمه­سینه

دؤزه بیلمه­دیم…،

آنامین دیلینی کؤکوندن قوپارتدیم!

داها پان تورکیست اولماغیمیزا بیر بهانه­نیز قالماسین

آنام پانسیز تورک اولدو

تورک آنامین پانینی قوپارتدیم

قاباغینیزا آتدیم

یئیین آنامین پان مارکلی دیلینی

حارامینیزاولسون!

سونرا اؤز مارکینیزی یاپیشدیرین آلنیزا

قویون آلین یازینیز گؤزه چارپسین

یالینیزی آلدینیزسا

آنامین هؤروکلرینه

هورمه­یین داها!

بو گئجه اولدوزلار

داماجاق آنامین گؤزلرینه

یاغاجاق ساچلارینا

 آی ایشیغی

آنامین یاراشیغی

گئدین ایشینیزده

پئشه­نیزده اولون!

د­ده­م هئـ…ی­ِی­ی­ی…!

آنامین دیلینی کؤکوندن قوپارتدیم!

ایتلرین قاباغینا آتدیم!

د­ده­م هئـ…ی­ِی­ی­ی…!

 او قاتیلین قانلی گؤزلری

ان گؤزل ماهنی­نی

قاتیل­لر اوخویورلار

اؤلدوردوکلری آداملارین اوستونده

ان گؤزل ماهنی­نی

قاتیل­لر یازیرلار

داملا – داملا آخان

دیرناقلارینداکی قانلارلا

ماهنی­لار سورونور

قارانلیق اوتاقدان

قانادلانیر قانلارین اوستوندن

قیپ-قیرمیزی

قارایا چالان

ایستی نوت­لار

کؤپوکله­نیر اؤلوم

پیله­ییر قاتیل­لر

گؤیده اوچان کؤپوکلری

او قدر گؤزل اولور

او قدر گؤزل اؤلدورور

سئوینجدن قان دولور قاتیللرین گؤزلرینه

ان گؤزل رسمی

قاتیل­لر چکیرلر

اوره­یه باتیب چیخان

بیچاغین قانیلا

چیله­نیر ساری ایشیغا قاریشان

قیپقیرمیزی قانلار

چکیلیر اؤله­نین رسمی

قاتیلین کؤینه­یینده

ان گؤزل سیقارئت چکمک فیقوراسین

قاتیللر توتورلار

قانلی بارماقلارین آراسیندا

پوفله­نیر اؤلوم

نه گؤزل اولور

قارانلیق اوتاقدا

سیسقا ایشیق آلتیندا

ماسماوی توستولرین آراسیندان

گؤرونن او قاتیلین قانلی گؤزلری