سؤزوم ياشيلليقدان باشلانير
سؤزوم ياشيلليقدان باشلانير
تورپاغين آلتيندايديم. اوستومه قارانليغين آغيرليغي تؤكولموشدو. ائله بيل دونيانين آغيرليغي منيم اوستومدهايدي. كيمسه منيم وار اولماغيمدان خبري يوخويدو. من خبرسيزلر يوردوندا تكليييمدن داريخاركن، سوسوزلوغومدان قوروموشدوم. مني دويانلار دونيالاريندان دويموشدولار و دونياني دونياچيلارا باغيشلاميشديلار. هر نه قورو و من ده قورولار ايچينده قورويوردوم. تورپاق هر گون قورو بير آغيرليغا دؤنوردو. و تورپاقدان يارانميشلار، تورپاغا اوز چؤندرميشديلر. اوزون زامان ايدي كي ياتميشديم و ياتميشلارين يوردوندا بو قارانليغين آغيرليغيندان كيمسه مني اوياتماق ايستهميردي. اويانانلارين ديلينه يئكه بير قيفيل باغلانميشدي. داريخيرديم. بوتون بو قورو وارليغيمدان قورتارماق اوچون اويانماق ايستهييرديم. من اوياق ايديم هر نهيي ائشيديرديم آنجاق آياغا قالخا بيلميرديم. آياغا دورماق گرك و آياقدان دوشنلري آياغا قالديرماق گرك ايدي.
شير!… شير!… شير!… ائله بو سس مني يوخودان اويالتدي دوردوم نئچه ايلليك دورغونلوقدان اويانديم. يولونو گؤزلهديييم گلدي. تورپاغين داماريندا سئوينج آخينتيسي آخدي و منيم وارليغيمدا سئوينمك چيچكلندي. سئوينديم و مني سئونلري سئوينديرديم.
اؤز قينيمدان چيخيب تورپاغين دريسيني قوپارداركن گونشين ايلك پارلاق ساچاقلاري منيم گؤودهمي دارادي.
آخ!… ايشيق!… ايشيق!… نئچه ايل حسرتينده قالديغيم آرزي. بؤيويوردوم و بؤيوكلرين سئوينديييني گؤروردوم. آرتيق بير ياشيل نغمهيه چئوريلميشديم و تورپاغين چاتلاغيندان بوي آتيب بويلانيرديم. گونش بويوما اوخشاييردي و من گونشه ساري بوي آتيرديم. يولوم قارانليقدان چكيلركن ايشيقليقدان كئچيردي. بو يول يولسوزلارين يولو ايدي.
ايندي من آرتيق بوي آتميش بير ياشيل يارپاغام و سؤزوم ياشيلليقدان باشلانير. هئچ بير بالتا قورخوسو ايله ياشاميرام، چونكو كؤكوم اَن درين يئردهدير. داللاسالاردا يئنه گؤيرهجهيم و يئنه بير يارپاغا چئوريليب ياشيلليقدان دانيشاجاغام، ياشيلليقدان!
∞∞∞∞
